‘Sta turri posata supr’ e scogghi,
a ‘ccarizza ‘stu mari vellutatu,
nu piscaturi ca varca chi si cogghi
niru nda facci pari ch’è pittatu.
Nc’è na palumba sula sula a mmari
chi si vicina a mmia chianu chianu,
a genti chi ‘ncumincia a passiari
ddu zziti chi si tenunu ra manu.
Ra turri fin’o campu viiu genti
e a sira si llonga e matinati,
parrunu tutti e parunu cuntenti
i Bagnara ndi sti sirat’ i stati.
Vola, luntanu vola u me penzeri,
sugnu ssettatu cca sulu e ssulatu,
ti scrivu ‘n autra vota com’a ieri
ma penzu chi pe mmia tutt’è passatu.
Bagnara Calabra 23 09 2009