Lo spunto a Rocco lo ha dato questa antica composizione di Pietro Milone, che esalta la laboriosità e la ricchezza di Bagnara d'un tempo.
A noi oggi, purtroppo, restano tanti rimpianti
‘Sta cosa vogghiu scriviri
prima ra me morti
e vogghiu ma capisciunu
tutti ! .Pur’i storti !.
Amici paisani
ru campu e pagghiara
oggi vogghiu diri
chi penzu ‘i Bagnara.
Ra storia capiscia
ch’erumu na putenza
l’omini ‘i Bagnara
genti di simenza,
chi dezuru lavuru
a tanta povira genti
e i nosri ‘ntellettuali
tutti bravi veramenti.
Jeu sugnu cunvintu
ch’è furtuni ‘i stu paisi
furu l’operai
chi puru chin’i spisi,
lavurandu jornu e notti
cu suduri cosruiru
e a ‘n pezziceiu a vota
stu paisi u ricchiru.
Sa volimu diri tutta
e non è a prima vota
avivunu mugghieri
‘i vantu “ A BAGNAROTA”
Mentri l’autri paisi
restaunu ca ucca aperta,
pecchì cca a Bagnara
sta cos’a era certa…
U lavuru non mancava
i mesteri erunu tanti
erumu i cchiù bravi
‘i tutti i cummercianti.
Nta ‘stu paisi meu
nc’erunu i pomperi
a guardia ì finanza
u carceri i carabineri
nc’era a pretura
u mercatu generali
nc’era a “cultura”
ru sapiri fari.
Vantu ra Calabria
nta tempi ‘i vita amara
a reggina ‘i tutti paisi
era a me Bagnara.
Oggi non è così
ndi superaru tutti
erumu ricchi e belli
ddiventammu poviri e brutti.
Non nc’è cchiù ‘n lavuru
e sordi non si ndi viri
e cu nd’avi tanti
si voli sulu teniri.
I srati non ndi parrau
chiusi ‘i ddu muntagli,
se piscia u Criaturi
subutu ti spagni.
Franunu tempu nenti
e se ti senti mali
sulu ‘n elicotturu
ti porta o spitali.
Mancu i piscaturi
‘sta vota a ndovinaru,
e i testi ‘i simenza
mali i cunzigghiau.
Gioi, Parmi,
Polistina,Taurianova,
oggi sti paisi
fannu a tutti scola.
I genti ‘i sti paisi
scindivunu a Bagnara
oggi simu nui
chi facimu a scupa para.
Bagnara docet
Milone così scriviu
nto millinovicentusetti
ma ora tuttu finiu.
A curpa è ‘i tutti
a nviria ndi inchi a panza
scumpariru i bagnaroti
l’omini ‘i sustanza.
Bagnara 7 01 2010.