Capurannu a casa ndu passamu,
tutti ssettati nda ‘na tavulata,
menzi pignati, prima mbiscitamu,
tuttu prontu nda tavula conzata.
U zzì Pascali, ca manu lesta,
pigghia pruppetti e ‘ncumincia a mangiari,
mentri Meluzzu viri se ndi resta:
se poi finiscinu si senti mali.
U piscistoccu fattu ‘nzalata,
sutta a seggia ‘na cascia i nuci.
Chi trippicei: oh, chi mangiata!
Tutti chi parrunu: oh, quantu vuci!
U caputavula è me’ zzì Ninu,
ogni minutu chi voli struzzari,
in tuttu si mbivi se’ litri i vinu
e poi i numira ‘ncumincia a dari.
Me zzà Cuncetta, ch’è so’ mugghieri,
nci rici:-Va’ curchiti, ‘mbriacuni!
Mentri ssettati vicinu o brasceri
Micu e Melu si fannu u scupuni.
U zzì Pascali apri buttigghi,
a zzà Mela passa a nzalata,
me soru parra ca figghia:
nci cunta i Mica, tutta scialata.
I figghioli i senti grirari,
Rosa lava pignati,
Vicenzu ‘ncumincia a sparari
bumbi e bumbetti fora nde strati.
A menzanotti, barcuni barcuni,
sparunu bumbi ch’i senti i luntanu.
U zzì Pascali, chi mangia turruni,
poi si mbivi tri quarti d’amaru.
Tutti speramu mi passa a sfortuna
e ‘n annu giustu mi poti ‘rrivari;
se a bona sorti no ndi ‘bbanduna,
sordi chi cofina amu a portari.
Mangiamu e jocamu tutta a nottata,
restunu sulu se’ litri i vinu:
ma appena chi brisci a matinata….
chju su futti tuttu u zzì Ninu!