Jeu mi ricordu
comu fuss’ ajeri
a fimmina ch’i saj
‘n giru, peri peri.
Chi vandia i pisci,
chi cuntrabanda u sali
o ch’i cofina ‘n testa
chi cala ru canali;
chi lava i robbi
vvasciata nda hjumara,
chi passa ra marina
e s’a faci para para;
chi tras’i paluni
intr’a galleria,
chi si cchiappa ri capii
quandu si sciarria;
chi vindi u latti
ri crapi ,strati strati,
chi vindi carvuni
a sacchi mmunzejati;
chi cala ri vigni
ch’i panara e mani
e quandu si ssetta
si spremi i mulingiani .
Ndi fici sacrifici
sta fimmina ‘i na vota,
levamundi u cappeju:
chista è a BAGNAROTA!
Bagnara 13 12 2005